L'CACHE AUX CAMPIGNONS
Un djou au matin que j'n dormos nin quo
Ed din m'ponasse j' r'mios comme n' biéte
Comme toudis, c'estot à ti qu'ej pinços.
Via m'idée ed single qui n' passe pal tiéte
Ej ravise l'heure, si ej dalos fé un tour a campignons
Ej me lève je r'saque m'can'çon, éyé m'ponette
J'enfile mes cauchettes, éyé m'tricoté à boutons
J'emmanche m'maronne, éyé m'vteille casquette
Sans fé ed potin, comme un voleu éj sors d'el baraque
A l'uche i' n' faisot nin four clair, mé ingellant
Ej prins m'seaux, j'infile mes chavattes
Qu'estinent à l'ermise pad'zou l'banc
Éyé me v'Ià dallé comme un grand alboziaux
Si l'visin m'avos rincontré, il aurot ieu l'escassouille
Ej vos pries ed croire qu'ej n'estes nin biaux
On aurot di iun qui dallot péqui a guernouilles
A part les biètes, j'estos tout seus éd din l'pature
Les vaques éyé les viaux m'ravisin't avec des sis tout
ronds
S'ils aurin't pu parler, soûla fin sus sur
Ils m'auri'nt dit t'as tout l'air d'un c...
Me v'Ia ti nin qu'ej veus passer n'cloture
Ej passe n'guambe, l'aute n'passe nin
Crac ihé v'Ià stindu comme u' flatte din l'pature
Frac m' main queille din n'saqué qui sint
Ej m'estampe v'Ia maronne qui dégringole
L'fichelle a mitan pourri qu'il ténot avot squété
Ouielle éj té vois, tu t'in fous, tu rigoles
D'en vir là din l'pature planté comme un piquet
Sans can'çon, les fesses à l'air, sans rin à m'eu
Ej clicotos des dins, comme un tchin qui tchie des loques
Arniqué jusqu'à em'pense, éyé l'reste estot
nu
Mé piaux s'ragrigni'nt s'estot ed venu du toc
Ej m'abache. à l'hierpe j'estorque m'min
In m'erdressant, j'ermonte m'maronne qu'estot su mes talons
Éyé m'ralouille el fichelle, in f'zan un nœux marin
Ouf ça dalo mieux, me r'venons al cache aux campignons
Tu m'vois d'aller affublé comme gribouille
Mes loques s'in allient éyé ej les suivot
D'el cache aux campignons, éj sus r'venu bredouille
Al place des campignons, c'estos des vesses des leus qu'j'avos.
RENE VROONHOVE
maire de Boussois de 1945 à 1977